1952 – 2021
Fe gollwyd un arall o sêr y byd pop Cymraeg, Charli Britton, fu’n enwog fel drymiwr a dylunydd graffeg.
Bu farw’n 68 oed. Fel drymiwr gydag Edward H Dafis yr adnabyddwyd ef orau, ond fe fu’n perfformio gyda nifer o artistiaid a grwpiau eraill, fel Ac Eraill, Dafydd Iwan ac Injaroc. Ymddangosodd ei enw fel drymiwr ar nifer o recordiau Cymraeg o’r 70au ymlaen. Bu’n ddrymiwr sesiwn ac yn diwtor drymiau hefyd.
Fe’i annwyd yng Nhaerdydd, cael ei addysg yn ysgol Rhydfelen ac yna astudio graffeg yn Llundain. Fe gynlluniodd gloriau nifer o recordiau Cymraeg, gan gynnwys rhai o recordiau Edward H Dafis, a chyfranu llawer fel dylunydd yn y byd cyhoeddi Cymraeg trwy ei waith gyda’i gwmni dylunio yng Nghaernarfon.
Trydarodd cwmni Sain fel hyn amdano: “Rydym yn meddwl am deulu a chyfeillion Charli Britton heddiw. Colled fawr i Gymru ac i gerddoriaeth Cymru yw colli Charli – un a wanaeth gyfraniad enfawr. Dewin y drymiau. Diolch amdano.”
Y Blog Recordiau Cymraeg 